ពូសន!
ឱ្យតែឮឈ្មោះពូសន នរណាក៏ដឹងថាជាកំពូលអ្នករត់ម៉ូតូឌុប
ព្រោះគាត់ប្រកបរបរនេះតាំងពីនៅកំលោះរហូតដល់គាត់អាយុ៤០ជាងហើយក៏នៅតែរត់ម៉ូតូឌុបដដែល
បើនិយាយពីការបើកបរគាត់វិញ គឺថាមានជំនាញ គោរពច្បាប់ចរាចរណ៍
បងប៉ូលិសក៏ស្ងើចសរសើរគាត់ដែរ។
យើងដឹងស្រាប់ហើយថា
សព្វថ្ងៃនេះការបើកបរនៅលើដងវិថីប្រៀបបីឡើងធ្វើសឹកសង្រ្គាម
បើយើងមិនមានស្មារតី មិនប្រុងប្រយ័ត្ន នោះប្រាកដជាចាញ់សឹកពុំខានឡើយ
ការបើកបរនេះដូចគ្នា ត្រូវចេះអត់ឱនយោគយល់អធ្យាស្រ័យ
ទើបធ្វើដំណើរមានសុវត្ថិភាព។
ឥលូវយើងចូលមកដល់សាច់រឿងរបស់យើងវិញ…
នៅយប់មួយម៉ោងប្រមាណជាង៧កន្លះ
គាប់ជួនក៏មានភ្លៀងធ្លាក់យ៉ាងជោកជាំ ពុំមែនទើបតែភ្លៀងនោះទេ
គឺភ្លៀងតាំងតែពីម៉ោង៤ល្ងាច
ជាហេតុធ្វើឱ្យពូសនយើងមិនមានម៉ូយសូម្បីតែម្នាក់
គាត់ឈរនៅលើម៉ូតូយកដៃទ្រចង្កា ក្រោមដើមអំពិលបារាំងមួយដើមធំ
ដោយទឹកមុខស្រងូតស្រងាត់ ព្រោះគាត់ប្រាកដក្នុងចិត្តហើយថា
បើកាលណាគាត់ទៅផ្ទះវិញ លុយក្រោម ៣០ ០០០រៀល
ច្បាស់ជាត្រូវថ្មោងរបស់លោកស្រីប្រពន្ធគាត់ហើយ
ព្រោះនាងហ្នុងមើលឃើញតែពីលុយៗ បើអត់លុយស្អីៗក៏អត់ដូចគ្នា
ដូច្នេះទើបធ្វើឱ្យពូសនអស់សង្ឃឹម ដោយសារលុយគាត់ទើបតែបាន ១៥ ០០០
ប៉ុណ្ណោះ។
លុះបន្តិចក្រោយមក
គាត់ក៏បើកហ្វេសប៊ុកមើល
ក៏ឃើញព័ត៌មានមួយផ្សាយអំពីស្រ្តីម្នាក់ធ្វើអត្តឃាតខ្លួនឯងដោយចងកនឹងដើមចេក
ដោយសារខឹងប្រុសស្នេហ៍មិនឱ្យ Kdor (កាដូ)
ដល់នាង ទើបនាងធ្វើបែបនេះ។ រីឯពូសនវិញ ឃើញបែបហ្នឹង
ក៏កើតក្តីស្រណោះស្រណោក ដោយគិតថា
នាងនៅក្មេងខ្ចីមិនគួរណាគិតខ្លីបែបនេះ។
មិនយូរប៉ុន្មាន
ក៏មាននារីវ័យក្មេងម្នាក់បានដើរមកជាមួយនឹងសាក់កាដូនៅពីក្រោយខ្នងក្នុងឯកសណ្ឋានជាសិស្សនៅសាលាឯកជនមួយ។
នាងដើរមកដល់ ក៏សួរពូសន…
នារី៖
លោកពូ! លោកពូរត់ម៉ូតូឌុបមែន?
ពូសនឆ្លើយដោយញញឹមញញែម! ពូសន៖ បាទ! បាទ! ក្មួយស្រី
គឺពូហ្នឹងហើយអ្នករត់ម៉ូតូឌុប តើក្មួយចង់ទៅណាមែនទេ?
នារី៖ ចាស៎! គឺក្មួយចង់ទៅផ្ទះ!
ពូសន៖ ហើយចុះតើផ្ទះក្មួយនៅម្តុំណាវិញ?
នារី៖ ខ្ញុំអត់ស្គាល់ផង ភ្លេចបាត់ហើយ
ពូជួយជូនក្មួយទៅផ្ទះតិចទៅណា៎ពូ!
ពូសន៖ ទេ! ហើយចុះបើក្មួយមិនទាំងស្គាល់ផ្ទះខ្លួនឯងផង
តើឱ្យពូស្គាល់ផ្ទះក្មួយយ៉ាងម៉េចនឹងកើតទៅក្មួយ?
នារី៖ ឥលូវពូឌុបខ្ញុំសិនទៅ ពេលដល់ចាំក្មួយប្រាប់
ហើយនេះលុយ ក្មួយឱ្យពូមុនចុះ មិនបាច់អាប់ទេ។
ពូសនគ្រាន់តែឃើញលុយដុល្លារទាំងដុំៗបែបនេះហើយ
ក្នុងចិត្តរំភើបយ៉ាងខ្លាំង តែខំធ្វើជាអត់យក រុញចុះរុញឡើង។
ពូសន៖
ទេក្មួយ លុយនេះដូចជាច្រើនខ្លាំងណាស់ ពូមិនអាចទទួលយកបានទេ។
នារី៖ ពូយកទៅចាត់
ទុកថាក្មួយជូនពូទុកទិញកាដូឱ្យស្រីស្នេហ៍ពូទៅចុះ
ពូសនញញឹមខ្ជឹប
រួចក៏ទទួលដោយក្តីរីករាយ
បន្ទាប់មកពូសនក៏បានដឹកស្រីស្អាតម្នាក់នោះទៅតែម្តង
ពូសនបើកម៉ូតូហាក់សប្បាយចិត្តជាខ្លាំងដោយសារបានឌុបស្រីស្អាត
ទើបធ្វើឱ្យគាត់រីករាយយ៉ាងនេះ ពូសនដឹកនាងចុះឡើងៗហាក់នៅកន្លែងដដែល
គាត់ចាប់ផ្តើមប្លែក រីឯក្លិនស្អុយក៏ចាប់ជះចូលមក
ដល់ពេលគាត់មើលទៅកាន់នារីម្នាក់នោះតាមរយៈកញ្ចក់
ក៏ស្រាប់តែឃើញនាងគ្មានក្បាលឡើយ គាត់ភ័យខ្លាំងមែនក៏មើលម្តងទៀតដើម្បីឱ្យច្បាស់
ពេលនោះគាត់ក៏ឃើញនាងនៅសភាពស្រស់ស្អាតជាធម្មតា។
នារី៖
ពូកើតអីមែន? បានមើលខ្ញុំរួចញញឹមរហូតអញ្ចឹង
ដឹងទេថាក្មួយអៀនណាស់។
ពូសន៖ ហឹម! ព្រោះពូឃើញក្មួយឯងស្អាតពេកទើបពូមើល!
នារី៖ ពូឯងចេះតែបញ្ជោរក្មួយហើយ ដឹងអីទេអាបល់យ៍!
បន្ទាប់មក
ពូសនក៏បានឌុបនារីស្រស់ស្អាតមកដល់ផ្ទះរបស់នាង
នាងក៏លាពូសនហើយដើរចូលផ្ទះបាត់ទៅ
ចំណែកពូសនវិញក៏លូកបើកកាបូបគាត់មើលដោយញញឹមខ្ជឹប
ស្រាប់តែទឹកមុខគាត់ប្រែភ្លាមដោយសារលុយដុល្លារទាំងអស់នោះសុទ្ធសឹងតែជាក្រដាស
ពូសនខឹងណាស់ដែលត្រូវបានក្មេងបោកបានយ៉ាងដូច្នេះ
គាត់ក៏ដាក់ជន្ទល់ម៉ូតូរួចដើរតាំងៗចូលផ្ទះរបស់នាង
ស្រាប់តែពេលគាត់ចូលដល់ក៏ឃើញមនុស្សម្នាកំពុងនាំគ្នាយំឱបមនុស្សម្នាក់ដែលគ្របដោយកំណាត់ស
លុះពេលគាត់ទៅមើលជិតក៏ឃើញថា
រូបថតនោះគឺជារូបរបស់ក្មេងស្រីដែលគាត់បានដឹកអម្បាញ់មិញនេះ
គាត់ក៏សួរទៅអ្នកនៅក្នុងផ្ទះនោះដោយញញីញញ័រថា “តើនាងស្លាប់យូរហើយឬនៅ?” ពួកគេក៏ប្រាប់ថា នាងស្លាប់តាំងពីល្ងាចមិញមកម៉្លេះ។
គ្រាន់តែស្តាប់បានប៉ុណ្ណេះ
ពូសនភ័យញ័រខ្លួនដូចកូនសត្វ មិនតែប៉ុណ្ណោះទេ
រូបថតនារីវ័យក្មេងនោះថែមទាំងសើចញាក់ចិញ្ចើមដាក់គាត់ទៀត
គាត់ក៏រត់ចេញយ៉ាងលឿនសំដៅទៅម៉ូតូ ព្រះអើយ!
នាងខ្មោចស្រីស្អាតគឺកំពុងតែអង្គុយនៅលើម៉ូតូ ពូសនភ័យពេកក៏រត់ទៅផ្ទះយ៉ាងលឿនទាំងនោមដាក់ខោជោកអស់គ្មានសល់។
លុះទៅដល់ផ្ទះ
មីងជិន បានដេញពូសនចេញពីផ្ទះ
ដោយសារគាត់គ្មានប្រាក់ឱ្យខ្លួនលើសពី៣ម៉ឺនរៀល។
ពូសនក៏ឡើងទៅដេកលើដំបូលផ្ទះបានមួយសន្ទុះ
ក៏មានអាបមកពីណាមិនដឹងទេបានមកលួចបឺតមាត់គាត់។ មីងជិន
គិតថាប្តីខ្លួនលួចមានសាហាយជាមួយអាប
ក៏ឡើងទៅលើដំបូលផ្ទះចាប់បោចសក់អាបរួចទះកំផ្លៀងនាងអាបយ៉ាងដំណំផងដែរ
ហើយរឿងក៏ចប់ត្រឹមណេះទៅ
0 Comments